ကမ္ဘာ့စက်ရုပ်ပြိုင်ပွဲတွင် AI အသုံးပြု ရှာဖွေကယ်ဆယ်ရေး စက်ရုပ်ကားတီထွင်ခဲ့သော မြန်မာကလေးငယ်အဖွဲ့ ပထမဆုရ
- 2 views
09/23/2025
ဖိလစ်ပိုင်နိုင်ငံတွင် စက်တင်ဘာ ၁၉ ရက်မှ ၂၁ ရက်အထိ ကျင်းပခဲ့သော ကမ္ဘာ့စက်ရုပ် အိုလံပစ် အာရှပစိဖိတ်ပြိုင်ပွဲ(World Robot Olympiad Asia Pacific Open Championship) တွင် မြန်မာ We are Genius MYANMAR အသင်းသည် AI အသုံးပြုရှာဖွေ ကယ်ဆယ်ရေး စက်ရုပ်ကားဖြင့် ပထမဆုရရှိခဲ့ကြောင်း သိရသည်။
အဆိုပါပြိုင်ပွဲသည် စက်ရုပ်ကားကို သဘာဝဘေးဒဏ်အန္တရာယ် ကျရောက်သည့် အခြေအနေ များတွင် လူဝင်ရောက်ရန် ခက်ခဲသော နေရာများထဲသို့ အလိုအလျောက်သွားလာသော စနစ်ဖြင့် ရှာဖွေကယ်ဆယ်ရေးပြုလုပ်နိုင်ရန် ရည်ရွယ်ထုတ်လုပ်ပြသမှုဖြင့် အောင်မြင်မှုရရှိခဲ့သည်။
ယင်းပြိုင်ပွဲ၌ We are Genius MYANMAR အသင်းတွင် မိုးပြည့်စုံကျော်(၁၁နှစ်)၊ ကျော်ဘုန်းခန့်ဇော်(၁၁ နှစ်)နှင့် ဉာဏ်ကိုး (၁၂)နှစ်တို့သည် ဟောင်ကောင်၊ တရုတ်၊ ဂျပန်၊ ဂျာမနီ၊ ထိုင်း၊ ဗီယက်နမ်၊ ဖိလစ်ပိုင်၊ ဘင်္ဂလားဒေ့ရှ်၊ မကာအိုစသည့် နိုင်ငံများဖြင့် ယှဉ်ပြိုင်ခဲ့ကြပြီး ပထမဆု ရရှိခဲ့သည်။
ကမ္ဘာ့စက်ရုပ်အိုလံပစ် အာရှပစိဖိတ်ပြိုင်ပွဲတွင် မြန်မာနိုင်ငံကိုယ်စားပြု We are Genius MYANMAR အသင်း၊ ILBC ၊ CIY Club တို့ ဝင်ရောက်ယှဉ်ပြိုင်ခဲ့ကြကြောင်း သိရသည်။
အာကာလင်း
