ဧရာဝတီတိုင်းဒေသကြီးရှိ ပင်လယ်ကမ်းခြေ၌ သီတင်းကျွတ်ပိတ်ရက် အပန်းဖြေ အနားယူရန် ဟိုတယ်များ၏ ၈၀ ရာခိုင်နှုန်းကို ပြည်တွင်း/ပြည်ပ ခရီးသွားများ ကြိုတင်မှာကြားထား

09/28/2025

လာမည့် သီတင်းကျွတ်ကာလအတွက် ဧရာဝတီတိုင်းဒေသကြီးရှိ ချောင်းသာ၊ ငွေဆောင်၊ ရွှေသောင်ယံနှင့် ဂေါ်ရန်ဂျီကျွန်း စသည့် ပင်လယ်ကမ်းခြေများရှိ ဟိုတယ်များ၏ ၈၀ ရာခိုင်နှုန်းကို အပန်းဖြေ အနားယူလာရောက်ရန် ပြည်တွင်း/ပြည်ပ ခရီးသွားများက ကြိုတင်မှာကြားထားပြီး ဖြစ်ကြောင်း ဧရာဝတီ တိုင်းဒေသကြီး ဟိုတယ်နှင့် ခရီးသွားညွှန်ကြားမှုဦးစီးဌာနမှ သိရသည်။

အဆိုပါ ပင်လယ်ကမ်းခြေများသို့ ၂၀၂၃ ခုနှစ်နှင့် ၂၀၂၄ ခုနှစ်တို့တွင် တစ်နှစ်လျှင် ခရီးသွား ငါးသိန်းကျော် ဝင်ရောက်ခဲ့၍ ယခုနှစ် ဩဂုတ်လအထိ ခရီးသွား ၁၅၉,၂၁၃ ဦး ဝင်ရောက်မှုရှိကြောင်းသိရပြီး ယခုသီတင်းကျွတ် ကာလမှစကာ ခရီးသွားများ ပိုမိုဝင်ရောက်လာမည်ဟု ဒေသခံ ဟိုတယ်နှင့်တည်းခိုခန်းလုပ်ငန်းများက မျှော်မှန်းထားသည်။

“လာမယ့် သီတင်းကျွတ် လပြည့်ကာလမှာ ဧရာဝတီတိုင်းဒေသကြီးက ပင်လယ်ကမ်းခြေတွေကို ခရီးသွားတွေ ဝင်ရောက်လာဖို့ရှိပါတယ်။ ပင်လယ်ကမ်းခြေနေရာ လေးခုမှ တည်းခိုခန်းတွေရဲ့ ၈၀ ရာခိုင်နှုန်း ကြိုတင်မှာကြားမှု ရရှိထားပြီးပါပြီ။ ငွေဆောင်မှာ ဟိုတယ်၊ တည်းခိုခန်းနဲ့ တည်းခိုရိပ်သာ ၃၈ လုံး၊ ချောင်းသာနဲ့ ရွှေသောင်ယံမှာ ၃၈ လုံးနဲ့ ဂေါ်ရန်ဂျီကျွန်း အပါအဝင် အခန်းပေါင်း ၄၉,၁၉၇ ခန်း ဖွင့်လှစ် ထားပါတယ်။ ခရီးသွားလုပ်ငန်းဆိုတာ အားလုံးပူးပေါင်းဆောင်ရွက်မှ အောင်မြင်မှု ရရှိတဲ့လုပ်ငန်းဖြစ်ပြီး မီးခိုးတိတ် ဝင်ငွေရတဲ့ လုပ်ငန်းလည်းဖြစ်ပါတယ်။ ဒေသတစ်ခုရဲ့ လူမှုစီးပွားဘဝကို မြှင့်တင်နိုင်တဲ့ လုပ်ငန်းတစ်ခုလည်း ဖြစ်ပါတယ်။ ဟိုတယ် ၈၀ ရာခိုင်နှုန်း ကြိုတင်မှာကြားမှု ရှိတဲ့အတွက် ဒေသခံတွေအတွက် အလုပ်အကိုင်အခွင့်အလမ်းတွေ ပွင့်လန်းပါတယ်” ဟု ဧရာဝတီတိုင်းဒေသကြီး ဟိုတယ်နှင့် ခရီးသွား ညွှန်ကြားမှုဦးစီးဌာနမှ ညွှန်ကြားရေးမှူး ဦးအောင်သူဦးက ပြောသည်။

ဧရာဝတီတိုင်းဒေသကြီး အစိုးရအဖွဲ့အနေဖြင့် ဒေသဆိုင်ရာ ခရီးသွားလုပ်ငန်းကော်မတီ၊ ဟိုတယ်နှင့် ခရီးသွားညွှန်ကြားမှုဦးစီးဌာန၊ မြန်မာနိုင်ငံ ခရီးသွားလုပ်ငန်းအဖွဲ့ချုပ်၊ မြန်မာနိုင်ငံ ဟိုတယ်လုပ်ငန်းရှင်များအသင်း၊ မြန်မာနိုင်ငံ ခရီးသွားလုပ်ငန်းရှင်များ အသင်းတို့နှင့် ပူးပေါင်း၍ တိုင်းဒေသကြီး၏ GDP ကိုမြှင့်တင်နိုင်ရန်နှင့် နိုင်ငံတကာခရီးသွားများကို ဆွဲဆောင်နိုင်ရန် ကြိုးပမ်းဆောင်ရွက်လျက်ရှိကြောင်း သိရသည်။